الورقي
بصورة سوداء.. عصام صاصا: ما باليد حيلة وفي رقبتي أمي وعائلتي ومصاريف البيت والاقساط
كشف مؤدي المهرجانات عصام صاصا عن تفاصيل عودته لاستئناف نشاطه الفني بعد حادث دهسه لشاب على الدائري.
ونشر عصام صاصا عبر حسابه الرسمي على موقع التواصل الاجتماعي "فيسبوك" صورة سوداء وكتب عليها: "بسم الله الرحمن الرحيم.. ربنا وحده يعلم انا بكتب الكلام دا وانا عامل ازاي وفيا ايه".
وأضاف: "انا بقالي اكتر من شهر قاعد من غير شغل ومعنديش اي حاجه اعملها غير اني قاعد وما باليد حيله ومستني قضاء ربنا سبحانه وتعالي ومحدش هيفهم أو هيحس بالموضوع غيري.. وانا مطلعتش اتكلمت وعدت وزدت في الموضوع كتير ومحدش شافني حتى بفيديو قولت اي كلمة خالص".
وتابع عصام صاصا خلال منشوره: "لكن انا عندي شغلي وعندي عقود والتزامات لما اعملها واخلصها يا اما هدخل في قصه تانيه انا مش قدها وشرط جزائي.. انا هنزل شغلي وهشتغل لاني مش بايدي اي حاجه غير اني اعمل كده".
وأوضح: "انا عندي امي وعندي اخويا وعندي مراتي وابني وفرقه فيها اكتر من ٣٥ شخص في رقبتي انا شاب لسه ببداء حياتي ولسه بقول يارب.. مصاريف البيت والاقساط والحاجات دي كلها اللي انتو متعرفوش عنها حاجه مين اللي هيدفعها انا طالع اتكلم لان ما باليد حيله غير انكم لازم تفهموا ان كل اللي بتسمعوا مش صح الفلوس والقصور والعربيات كل ده مش صح وحال الناس اللي شاغلين معايا كل دول حالهم واقف بسببي انا كل دول ليهم بيوت وعيال ودنيا تانيه خالص".
واستكمل: "انا عارف ومتاكد ان ربنا مش هيورينا الشر ومش هيوريني اي حاجه وحشه ده ابتلاء من عند ربنا سبحانه وتعالي وانا راضي بكل حاجه ومش هقول غير الحمدلله علي كل شئ والحمدلله واللي ربنا كاتبهولي هشوفوا.. سوا خير أو شر".
واختتم عصام صاصا قائلًا: "محتاج من كل الناس اللي بتحبني تدعيلي من قلبها بجد انا عمري ما كنت شخص مؤذي وعمري ما كنت شخص وحش مع حد.. ربنا كبير.. وحشتوني أو ي يا احلي جمهور في الدنيا.. عصام صاصا".
يذكر أن الأجهزة الأمنية بمديرية أمن الجيزة، ألقت القبض على مؤدي المهرجانات عصام صاصا يوم 6 مايو، بتهمة دهس شخص أعلى دائري المنيب، ثم أخلت النيابة سبيله بكفالة مالية قدرها 30 ألف جنيه، وتم ضبطه بعدما أثبت تقرير الطب الشرعي، تعاطيه المخدرات وقت قيادته السيارة.
وتم اتخاذ الإجراءات القانونية اللازمة، وتولت النيابة العامة التحقيقات والتي أمرت بإحالة المتهم إلى محكمة الجنايات المختصة، بتهمة القتل الخطأ وتعاطي مواد مخدرة.
