مؤسس "أمهات مصر" ترصد كيف يقضي طلاب الثانوية العامة أيام العيد وأجواء الأسر

رصد اتحاد "أمهات مصر" كيف يقضي طلاب الثانوية العامة أيام العيد وأجواء الأسر مع عودة الامتحانات.

وقال الاتحاد: "كل سنة وأنتم طيبين.. أولياء أمور طلاب الثانوية العامة ربنا يعينكم ويقويكم.. احكولنا يومكم بيمر إزاي أيام العيد في المراجعة علشان نفيد بعض"، بهذه الكلمات وجهت عبير أحمد مؤسس إتحاد أمهات مصر للنهوض بالتعليم، وائتلاف أولياء الأمور، حديثها لهم.

وتفاعل أولياء أمور طلاب الثانوية العامة، على صفحة اتحاد أمهات مصر للنهوض بالتعليم، وائتلاف أولياء الأمور، في الفيسبوك، حيث قالت ولي أمر: "قلق شديد وترقب، ربنا يهونها عليهم وعلينا ويسر لهم كل صعب، اللهم لا سهل إلا ما جعلته سهلا وأنت تجعل الصعب سهل وتجعل الحزن سهل سهلة عليهم يااارب".

وأضافت ولي أمر أخرى: "بنتى بتنام وقت قليل جدا وبيصحوا بدرى، وكل شوية بدخل عليها الأوضة أخليها تفصل شوية حوالى عشر دقايق، نقعد نتكلم ونهزر، وبتحضر مراجعات علي النت، وبتحل امتحانات، وربنا يعينهم طاقتهم خلصت، ويفرح قلبهم ويعوضهم عن تعب 11 شهر".

واستكملت ولي أمر أخرى: "فاضل 30 يوم بتعدهم باليوم والساعة، سنة خدت من طاقتنا وقلبنا ودمنا كتير بصراحه، ربنا يهون الباقي علي أولادنا وتخلص بخير وفرح وجبران خاطر يارب"، وتابعت أخري: "أرجو توصلو صوتنا، بلاش قطع كهربا أيام الامتحانات، أرجوكم الدقيقة بتفرق مع الأولاد".

وذكرت ولي أمر: "احنا محتاجين دعواتكم، ربنا يسهل عليهم يارب وتدعولنا إن اللي بيحط الامتحان ميتفزلكش فية كله، يارب يجعل العربي وباقي المواد برد وسلام على ولادنا، سنة طويلة ومرهق ماديا ونفسيا وجسديا".

وقالت ولي أمر: "بغض النظر عن الجو  والحر، قطع النور دا مشكلة لأن الأولاد مراجعاتهم كلها من علي النت، وطبعا النور يقطع كل حاجة بتقطع معاه، وأقل وقت بيقطع فيه مش أقل من ساعتين، بس هى دى المشكلة الرئيسية".

ولفتت ولي أمر إلي: "أكيد بيكون صعب جدا لأن الواحد بيكون في حيره، نفسي إنها تفرح بالعيد مع اخواتها، وفي نفس الوقت عايزاها تذاكر دون ضغط مني علشان نفسيتها، وأكيد الله يكون في عونها في الصراعات الداخلية اللي عندها، بالرغم إنها لا تظهرها، نسأل الله العظيم رب العرش العظيم أن ييسر عليهم كل عسير وأن ينور بصيرتهم وأن يجعل الصعب بين أيديهم سهلا".