مسئول بيراميدز يفتح النار على الجميع " إحنا أبطال والله "

نشر أحمد زاهر المدير الإداري لفريق بيراميدز منشور عبر صفحته على الفيس بوك عدد فيها أسباب كثيرة خارج الملعب يراها من وجهة نظره كانت بمثابة عراقيل متعمدة لتعطيل مسيرة الفريق وعدم إكماله المنافسة على لقب الدوري. 

وجاء نص المنشور كالتالي 

والله أبطال إن إحنا بنافس..

العب من غير الشيبى ده موقوف.. حاضر

العب من غير رمضان صبحى وهو فى أعلى فورمه وكان رايح منتخب بحجة منشطات وهمية.. حاضر

إبراهيم عادل واحد من أحسن اللاعيبة في مصر هيلعب معاك وبعدها يسافر.. لا معلش ده مصاب يوم ١٢ ويلعب مع المنتخب ١٤ سبحان الله مع إن حقى إنه ميروحش خالص.. بس برضه حاضر

أكتر حاجة مضحكانى فى موضوع إبراهيم عادل تصريحات عضو مجلس الجبلاية إن اتفاق لعب إبراهيم عادل اللى هو حقى أصلا وممكن ما يسافرش عادي بقرار مني كان بعلم المنافس طب هو ماله بالموضوع أصلا.

إعادة شوط سموحة مع إن اللائحة واضحة وبتقول المباراة تحتسب لبيراميدز.. بس برضه تاني حاضر

أول فريق يلعب بعد التوقف الدولى بيومين مع إن عنده نص الفريق مع المنتخبات في مخالفة صريحة للائحة.. حاضر

انت لازم تلعب الساعة ٤ وبعدها ٥ ونص في عز الحر مع إني بنافس، بس المنافس يلعب عادي بالليل.. حاضر

معلش أصل حكم مباراة المقاولون المفروض ميحكمش كارت معاهم لوقت اللزوم نطلعه

ظلم واضح من حكام مباراتين الدوري.. ويقولك الدورى ذهب لمن يستحق

ناس في الرابطة واتحاد الكرة طلعوا يهاجموا النادي لمجرد إنه بيدور على حقوقه وتقولي منافسة … إحنا أبطال والله

وكان بيراميدز يسير بشكل جيد في سلسلة من الفوز المتتالي منحته صدارة الدوري بفارق كبير من النقاط إلا أن فوز الأهلي في جميع مؤجلاته بالإضافة إلى فوزه على الفريق السماوي احبط مسيرة بيراميدز وأصبح درع المسابقة قريب من البقاء في قلعة الجزيرة