مريم تبكي أمام محكمة الأسرة..«سرق عيالي»

«سرق عيالي بعد كل اللي عملته عشانه، شوفت معاه أيام صعبة ونزلت أشتغل عشان أصرف ع البيت، وفي النهاية بلف على محكمة الأسرة»، هكذا وقفت الزوجة "مريم. ع" أمام محكمة الأسرة تطلب نفقة أطفالها مشيرة إلى معاملة زوجها السيئة معها.

وتابعت الزوجة في دعواها أمام محكمة الأسرة، بأنها تزوجت منذ ما يقرب من 12 عاما، بعد قصة حب كانت هي الأكثر تضحية في تلك القصة، من بعيد يبان على جوزي إنه بيحبني هو وأهله ومفيش مشاكل خالص وده كان الوضع في الأول فعلا، لكن بعد كدة كل حاجة اتغيرت، أنا شفت معاه أيام سودة خلتني اتمني إني كنت عمري ما قابلته في حياتي ابدا".
وأضافت الزوجة في دعواها أمام محكمة الأسرة بأن الخلافات بدأت بينها وبين زوجها منذ أول يوم في زواجهما، فالزوج لا يريد الإنفاق على أطفاله، فضلا عن أنه دائم الضرب والإهانة للزوجة، دون أي سبب، "مكنش بيبقى عايز ينزل يشتغل ومبيكملش شهر في شغلانة، لما اشتكيت لأهله قالولي لما يخلف هيتعدل لكن مفيش فايدة بقى أسوء بعد الخلفة، الأول أنا كنت بعرف اتصرف لكن دلوقتي العيال مبقوش لاقيين الأكل".
وتابعت الزوجة في دعواها أمام محكمة الأسرة بأنها ملت تصرفاته لذا تركت المنزل لمدة عام كامل وذهبت لمنزل والديها بسبب كذب زوجها وعدم تحمله للمسئولية، " لما رجعلته قلت خلاص أنا هعتمد على نفسي، اتفقت معاه إن اشتغل وأصرف على العيال مش عايزة منه حاجة غيره إنه يبقى موجود مع العيال وليهم أب مش لوحدهم، في الفترة اللي رجعت فيها لقيت ضرب وإهانة أول زيارة لأهلي بهدلني عشان خرجت من البيت وزرتهم".

واختتمت الزوجة دعواها أمام محكمة الأسرة، بأن زوجها أخذ منها أطفالها وطردها من منزل الزوجية، فضلا عن أنه سرق أموالها ومنقولاتها وباعهم، " جالي انهيار عصبي بسبب الضرب قعدت 4 شهور مش بتحرك غير خفيف بس، بعد كدة فوقت ورفعت نفقة وقايمة استلفت كتير عشان القضايا، هو متهرب من النفقة بسبب العنوان مش عارفين يوصلوا ليه خالص، بيقولي عايزة العيال خديهم بس مش هصرف عليهم جنية رافض أكلمهم أو أزورهم  ».