سميرة عبد العزيز.. وجودي في الوسط الفني بمساندة سميحة آيوب ومن يومها وأنا قاعدة جنبها (فيديو)

كشفت الفنانة القديرة سميرة عبد العزيز، عن تفاصيل دخولها الوسط الفني، لافتة إلى أن الفنانة سميحة آيوب هي التي ساندتها في بداية مشوارها.

وقالت سميرة عبد العزيز خلال ندوة تكريم الفنانة سميحة آيوب خلال فعاليات المهرجان القومي للمسرح في دورته الـ 17، والتي أدارتها الفنانة وفاء الحكيم، بحضور الناقد أمير أباظة ورئيس المهرجان محمد رياض: سميحة أيوب سبب وجودي في الفن، وقفت جنبي وقالت للمعترضين عليا إني امثل، دي مش جاية من الشارع دي بكالوريوس تجارة اختارها المخرج".

وأضافت: "أنا من إسكندرية وشاركت في فرقة الإسكندرية للمسرح وشافني كرم مطاوع هناك وقالي انا عايزك عشان تعملي مسرحية على المسرح القومي، وجيت القاهرة علشان اشتغل في المسرح القومي وأول يوم في البروفات قعدت في أخر تربيزة لاني غريبة والبنات بتوع المسرح القومي مقبلوش ان كرم مطاوع يجيب واحدة من مكان تاني عشان تشتغل في المسرح القومي وبدأوا يضيقوني".

وتابعت سميرة عبد العزيز: "مين اللي لاحظ الموقف ده مدام سميحة آيوب وقالتلي تعالي يا سميرة جنبي، ومن يومها وأنا قاعدة جنبها، بقيت حبيبتي وصديقتي، ولازم أطمن عليها كل يوم، هي روحي وقلبي وحياتي كلها وهي فنانة كبيرة، لها فضل عليا وأنا مدينة ليها".