محمد سامي: تامر حسني "سبب كل اللي أنا فيه دلوقتي"

وجه المخرج محمد سامي رسالة شكر للنجم تامر حسني، وكشف مساندته له في بداياته وشجعه ليخوض تجربة الإخراج، وكان أول عمل له مسلسل "آدم" من بطولة تامر، والذي عرض في عام 2011.

محمد سامي وتامر حسني

ونشر محمد سامي صورة تجمعه مع تامر حسني من كواليس مسلسل "آدم"، عبر حسابه الرسمي بموقع تبادل الصور والفيديوهات الشهير إنستجرام، وعلق: وَلَا تَنْسَوُا الْفَضْلَ بَيْنَكُمْ، وأنا قاعد إمبارح في التصوير افتكرت الرحلة والشقي والتعب من أول عمل لحد العمل اللي بصوره دلوقتي وافتكرت صعوبة الحصول على فرصة عشان الواحد يثبت نفسه ويحقق أحلامه"

واستكمل: "افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي، تامر قدملي كل الدعم والحب والإمكانيات اللي خلتني أثبت نفسي، وبالذات في وقت كان صعب الشباب ياخد في الدراما فرصة بحجم مسلسل آدم".

وأضاف: "فاكر إن الكل كان رافض إني أخد الفرصة دي ومستكبرينها عليا إلا هو وقف في ظهري كأنه بيحارب لأخوه، وبصلي مرة والظروف كلها ضدي وكنت حاسس وأنا بحضر إنهم هيجيبو حد غيري، وقاللي ده مسلسلك وهتعمله وهتنجح وهتنجحنا معاك، حتي طريقته المتواضعة وهو بيقوللي مسلسلك كأني عامل تسع مسلسلات قبله تحسس الواحد بنفسه وأهميته".

وتابع: "أشهد أمام الله إنك طول عمرك متواضع ومؤدب وتطلب الحاجة باحترام، ومع الكل محترم، وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني".