أكرم حسني يكشف سر تعاونه مع أنغام في أغنيتها الجديدة.. نص كيلو بن وسط محوج (فيديو)

كشف النجم أكرم حسني، عبر حسابه الرسمي على موقع "إنستجرام"  لأول مرة عن كواليس كتابته أغنية "تيجي نسيب" للنجمة أنغام.

ونشر أكرم حسني مقطعًا للملحن إيهاب عبد الواحد يغني "تيجي نسيب" على الجيتار ويسجلها على محموله، على الفيديو: "يوم التلات ٢ نوفمبر ٢٠٢١ الساعة اربعة الفجر: قام ايهاب عبد الواحد عشان يمشي بعد سهرة طويلة عندي في البيت ايهاب مسابش فيها الجيتار من ايده هو بيغني وكلنا بنغني معاه".

تفاصيل مكالمة أكرم حسني والملحن إيهاب عبدالواحد

إيهاب: تصبح علي خير يا أكرم

انا: وانت من اهله يا بوب عايزين نكررها قريب

إيهاب: يالا بينا اي وقت

بعد ما كله مشي جاتلي فكرة أغنية " تيجي نسيب " فكتبتها وخلصتها علي الساعة ستة الصبح، وهموت واكلم إيهاب عشان يجيلي يسمعها ويلحنها بس مكسوف اكلمه.. الراجل لسه ماشي من عندي من ساعتين وأكيد ملحقش ينام.. الساعة سبعة صباحا بعد ما قدرت امسك نفسي لمدة ساعة كاملة اتصلت بيه ف رد بصوت غرقان في النوم".

انا: صباح الفل يا بوب.. صحيت ؟ (سؤال فيه كمية استهبال مش طبيعية).

إيهاب: لا لسه.. انا نايم من ساعتين بس.. في حاجة؟

انا: لا يا حبيبي مفيش.. خلاص اصحي وكلمني.

الساعة سبعة وربع اتصلت تاني

انا: ايه يا بوب صحيت؟

إيهاب (بعصبية مكتومة قدرت احسها): أكرم انت كويس؟

انا: اه يا معلم تمام بس اصلي كتبت حاجة كده وحاسس إنها حلوة فعايز اسمعهالك

إيهاب (بحماس): لا ان كان كده هفوق والبس واجيلك

انا: يالا مستنيك

الساعة سبعة ونص اتصلت بيه

انا: بوب قهوتك ايه؟

إيهاب (بعصبية): أكرم.. والله العظيم بفوق وهاجي

انا: ماشي يا حبيبي مستنيك

الساعة تسعة إيهاب وصل

انا: بوب انا كتبت أغنية فرحان بيها أو ي

إيهاب: طب مش كنت بتسألني قهوتي ايه ؟

انا (بتجاهل): بص يا بوب الاغنية بتقول " تيجي نسيب.. تيجي نجيبها في النصيب.. تيجي نقول محناش لبعض ويبقي بعد تغيب واغيب............ "

إيهاب (باندهاش): مين اللي كاتب الكلام ده ؟

انا: انا

إيهاب (بنفس حالة الاندها ): انا قهوتي سادة

انا: حالا

وتابع أكرم حسني: "من الساعة تسعة للساعة 12 ايهاب مبيعملش حاجة غير إنه ماسك الجيتار وعمال يجرب جمل لحنية في دماغه ويطلب قهوة سادة".

وأوضح: "الساعة اتناشر وعشر دقايق كان خلص اللحن وبيسجله (بصوا الساعة اللي ورا عشان تتأكدوا) ومكانش يعرف اني لما قولتله وهو ماشي الفجر عايزين نكررها قريب إنه ا هتبقي قريب أوي كده".

واستكمل: "الأغنية راحت للموزع الكبير صاحب اللمسات السحرية حسن الشافعي عشان يحط بصمته عليها وتطلع بالشكل اللي انتوا سمعتوه".

واختتم أكرم حسني حديثه قائلًا: "أغنية تيجي نسيب اتكتبت واتلحنت في خمس ساعات واستهلكت نص كيلو بن وسط محوج، بس عشان طالعة من القلب ولحنها ملحن عبقري بيحس بكل كلمة ويترجمها للحن ربنا كرمنا بأن اللي يغنيها تبقي فنانة معجونة احساس وفن وحلاوة صوت وحضور طاغي ومكانة كبيرة في قلوب جمهورها في كل حتة في الوطن العربي.. أنغام".