زوجة في قضية خلع داخل محكمة الأسرة..«كنت خايفة أطلق»

«كنت خايفة يطلقني والناس تبص ليا نظرة وحشة، استحملت لحد ماكرهت عيشتي، وبسبب تصرفاته كنت هخسر حياتي فقررت أهرب وأخلعه»، كلمات بررت بها الزوجة دعوى الخلع التي أقامتها ضد زوجها، بعد حياة صعبة عاشتها لم يكن في قدرة أي شخص تحملها، وبالرغم من ذلك عاشت الزوجة وتحملت لرفضها فكرة الطلاق وخوفها من كلام الناس، لكن ما وصلت له أنها كرهت حياتها وكانت ستخسرها في وقت من الأوقات مما جعلها تهرب في النهاية لمحكمة الأسرة حتى تنهي أزمتها وتحصل على حريتها برفع دعوى خلع.
وقالت الزوجة في دعوى الخلع التي أقامتها ضد زوجها، أمام محكمة الأسرة، بإنها تزوجت منذ 2011، زوجها ابن عمها، لذا ظنت أنه سيحفظ صلة الدم ويحافظ عليها، ولكن ما آلت إليه هو محكمة الأسرة،  « رافعة على جوزي  قضايا من سنة فاتت وسايباه بقالي سنتين، الحياة مع جوزي كانت صعبة جدا من زمان شفت كل أشكال البهدلة، ضرب وإهانة وقله مصاريف واستحملته كتير على أساس في يوم يتعدل عشان خاطر ولاده لكن مفيش فايدة».
وتابعت الزوجة في دعوى الخلع التي أقامتها ضد زوجها، أمام محكمة الأسرة، بأن زوجها كان يعمل في مجال السياحة،«الشتا كان شغله قليل فكان دايما قاعد في البيت، ومع الوقت بدأ كمان قي الصيف يشتغل يومين ويبطل شغل يومين، كان بيبقى عايز فلوس وانا مبشتغلش لأنه رافض يخليني اشتغل ولما اطلب منه فلوس للبيت والعيال يقولي اتصرفي كنت باخد من أهلي بس بعد كدة حسيت إني تقلت عليهم، لو طلبت انزل اشتغل عشان أكفي البيت والعيال يضربني ويبهدلني ».
وأكملت الزوجة في دعوى الخلع التي أقامتها ضد زوجها، أمام محكمة الأسرة، «مكنتش راضية أسيبه وأطلق عشان خايفة من كلام الناس، بس سيبته لما زهقت منه من كتر الضرب والإهانة، كنت بقدر أتحمل الشتيمة والزعيق والخناقات لكن الضرب كان كتير وصعب كان بيضربني ويهني طول الوقت عشان عايز فلوس، وهو مكنش بيتعدل، مع الوقت بيزيد في طبعه وبهدلته ليا ».
واختتمت الزوجة حديثها في دعوى الخلع التي أقامتها ضد زوجها، أمام محكمة الأسرة، بأن زوجها حاول اكتساب رضاها بعد ذلك ولكنها رفضت العودة له، واكتشفت بعد ذلك أنه غصب من قبل إخوته، «حاول يرجعني مرة واحدة بس من ساعة ما سيبته ومكنش جايلي أصلا كان جاي لبنت عمه في فرحها وإخواته غصبوا عليه عشان يجي يشوفني ويطلب مني أرجع، مرديتش أرجع لأنه مكنش عايز يحل كان عايز يرجعني ونفضل على الحال اللي احنا عليه، رفضت أرجع للعذاب ده وجيت أرفع عليه قضية نفقة عشان ابني وبنتي اللي مبيسألش فيهم دول».