راندا البحيري تناشد المتحدة ونقيب الممثلين: "بيتم تهديدي يوميا بالحجز علي أموالي"

أصدرت النجمة راندا البحيري، بيانا منذ قليل، تناشد من خلاله الشركة المتحدة ودكتور أشرف زكي نقيب المهن التمثيلية، وذلك عبر حسابها الشخصي بموقع تبادل الصور والفيديوهات الشهير “إنستجرام”. 

راندا البحيري 

وقالت راندا البحيري في البيان: “الشركة المتحدة للخدمات الإعلامية.. السيد نقيب المهن التمثيلية، تحيه طيبه وبعد، هذا ليس بيان شجب ولا شكوي ولا أي شئ آخر … كل ما في الأمر عرض موضوعي علي حضراتكم.. لقد حوربت بداخل شركات الإنتاج المصرية وتم منعي من العمل دون إبداء أسباب وبالفعل بعد اكتر من بروفه لأكتر من عمل وأكتر من محاولات لدخولي أعمال فنية بلاقي نفسي فجاه اتشالت منها ومش فيها والعمل بيكمل من غيري”.

وأضافت: “الكلام ده بيحصل بالظبط بقاله اكتر من 7 سنوات وبيحاولوا فيه بقالهم اكتر من 13 سنه بمساعدة احد الأشخص خارج المجال الفني، وليس هذا صلب الموضوع أبدًا، أنا بتعرض بقالي اربع سنين دلوقتي لضغط لا يمكن لواحدة ست تقدر تتحمله لوحدها، أنا مشتكتش ولا خليت شكل الفن والفنانين وحش والتزمت الصمت وبقالي سنين بحاول أشتغل في مشاريع وفيه منها اللي ربنا كرمني فيه وفيه منه اللي علشان عدم خبرتي الكبيرة انذاك أتنصب علي فيه”.
 

واستكملت راندا البحيري: “يعني بسبب ان مفيش عدل في المنظومة أتنصب عليا في فلوس كنت شغاله بيها وجايباها ب تعب كبير جدا، كنت طول عمري شخص ماشي صح جدا فيما يخص الأوراق وحق الدوله وضرائبي كلها مدفوعه من 2004 يعني بقالي 20 سنه بدفع للضرائب، وأظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش أو معملتش أو كذا وكذا”.

وأشارت راندا: "محدش أصلا يقدر يشكك في حبي لبلدي الشديد ووطنيتي وفي نزاهتي الحمدلله رب العالمين، اكتشفت من فتره انهم حاطين عليّ ضرائب جزافية بالرغم من اني مبشتغلش في التمثيل أصلا، وكل ما أكلم حد في المبني بيقولي أصل الممثلين كلهم حصل معاهم كده مش انتِ بس !!!، طب أنا بتكلم عن نفسي 
اتكلمت مره واتنين، وكلمت نقيبي السيد اشرف زكي، وهو أداني نمرة تليفون الاستاذه مها المختصه عن الممثلين امام الهيئه العامة للضرائب بحيث إنه ا تفهمهم وقالي ان الموضوع ده هيخلص، لان الممثلة دي حاليا لا تعمل بالتمثيل، فمش هينفع اننا ندفعها فلوس قديمة هي أصلا دفعتها قبل كده".

وتابعت: “بالمستندات احنا أنا والمحاسب الضريبي المحترم اللي شغال معايا، دفعنا الفلوس اللي علينا من قبل 2005، كل سنة بندفعها في سنتها، انما هم مره واحدة، عايزينك تدفع ضرائب جزافية هم اللي حسبوها من غير ما يرجعولك، واضطريت في المره الأولي نظرًا لحبي لبلدي واحترامي لكيان الفنان المصري وعدم اهتزاز صورته امام المصريين والعرب اني امضي علي رقم كبير جدا مع اني متأكده ان أنا مش المفروض ادفع الكلام ده، على وعد منهم  والسيد أحمد عبد الغني، إني هدفع أصل المبلغ ومش هدفع غرامات علي المبلغ ده”.

وأوضحت البحيري: “بالفعل وقفوا غرامات وبقالي كذا سنه بقسط المبلغ ده للضرائب لحد الحمدلله ما خلصته كله، فوجئت بعد ما المبلغ خلص اولًا ب مبني القيمة المضافه بيكلمني عايز يدفعني غرامة بالرغم من انهم وعدوني مفيش غرامات.. والغرامه دي اكتر من المبلغ نفسه اللي بقسطة بقالي سنتين، ثم اتصال من كذا مأمور ((ضرائب عامه)) طالبين مني فحص كل سنين العمل اللي اشتغلتها، افحص 2006 اللي ورقها بقي لونه أصفر ؟؟؟؟، وطالبين اني ادفع من 2006 لحد 2024 يعني 18 سنه ضرايب أنا دافعاهم أصلا قبل كده، قولتلهم أنا دفعت ده، قالولي مينفعش، قولتلهم ايه هو اللي مينفعش، قالولي اصل احنا واخدين تعليمات ان كل الممثلين يدفعوا أزيد من اللي دفعوه، قولتلهم التعليمات دي منين ؟؟ محدش رد، قالولي كده كده هتدفعي حتي لو دفعتي قبل كده”.

واختتمت راندا البحيري قائلة: "إلا مختصة الحجز كل يوم بتكلمني (((أنا هحجز عليكي)))، أنا أول مره أشوف موظف بيتصل ب عميل الساعة 8 بالليل بعد مواعيد العمل علشان يقوله أنا هحجز عليك، يتم تهديدي يوميا بالحجز علي أموالي، يتم تهديدي يوميًا بالضرايب مع اني دفعت كل ضرائبي لحد آخر عمل عملته، يتم تهديدي يوميا بالضرايب مع اني لا اعمل مع المتحده ولا غيرها، السيد نقيب المهن التمثيلية 
الساده المسئولين عن الإنتاج في مصر 
ارحموا الممثل المصري، وبجد والله ما بطلب شغل أنا أصلا فقدت الشغف كممثله ومش عايزه أشوف وش الكاميرا دي تاني، أنا فعلا كل اللي طالباه إنكم تسيبوني في حالي بس مش اكتر، يا أسيادنا أنا عايزه اكمل حياتي في مصر،مش عايزه أدور علي شغل برا، ولا عايزه أعيش في حته تانيه ليه مصممين تزقونا كلنا ندور علي حياتنا في حته تانيه، أنا قاعده هنا".