الورقي
دينا عن اعتزالها الرقص: «مش هبطل»
ردت الفنانة دينا على مطالبات البعض باعتزالها الرقص.
وظهرت دينا في برنامج "اسمع من دينا" عبر حسابها على إنستجرام لتوجه رسالة لكل من يطالبها بالاعتزال وأكدت أنها لن تعتزل الآن قائلة: "أنا مش هبطل رقص لأني مدربة بقالي سنين عمر طويلة بدرب في العالم كله، هفضل أدرب وهفضل أرقص لحد ما صحتي تبقى مش مساعداني".
وقالت دنيا في رسالتها: "اللي بيقول إني لازم أبطل رقص كأن هو اللي هيحدد لي مسيرتي الفنية، ابتدي أمتى وأخلص أمتى وأعيش إزاي وأعمل إيه، بيقولوا إنتي لازم تبطلي دلوقتي هما جابوا اللي بيقولوه منين أولا مسأله التبطيل دي عرض وطلب أنا مش بخبط على الناس في بيوتهم وأقولهم شغلوني، شغل الفن طول ما أنت ماسك نفسك وقادر تقدم حاجة كويسة هتبقى مطلوب".
وتابعت: "المسألة مش مسألة قرار سهل تقدر تاخده دا مش قرار سهل خالص دا قرار صعب جدا الناس اللي بتشتغل لايف بالنسبة ليها جزء من حياتها وتركيبة يومها اتكونت على الشغل عشان يبطلوا محتاجين نقلة في حياتهم، مش مسألة أصحى من النوم بطلي اللي بتعمليه معتقدش اللي بيقول كده يقدر يبطل حاجة هو متعود إنه يعملها لكن هو يقدر يحكم على الناس كويس، لكن ميعرفش يحكم على نفسه، أنا بشوف أن الكلام دا في تحديد مصير الناس مش مفروض يتقال أساسا لأنك متعرفش البني آدم اللي قدامك ماشي إزاي ولا خطته في الحياة إيه محدش فينا أهبل كلنا عارفين بنعمل إيه كويس أوي".
وأكملت: "أنا مش هبطل رقص مع احترامي لكل اللي ممكن يزعل، لأني مدربة بقالي سنين عمر طويلة بدرب في العالم كله هفضل أدرب وهفضل أرقص لحد ما صحتي تبقى مش مساعداني لكن أنا هفضل موجودة، بعتذر للي هيزعل إني مش هبطل دلوقتي بس ياريت تفكر في نفسك وهتبطل إيه أمتى وأنا مش هتدخل في الموضوع ده لأني فاهمة ان كل بني آدم في الدنيا هو اللي بيحدد مصيره".
