الرئيس السيسي بقداس عيد الميلاد: كل عام وأنتم طيبين.. والقلق على مصر مبرر

حضر الرئيس عبد الفتاح السيسي، قداس عيد الميلاد المجيد، بمقر كاتدرائية ميلاد المسيح بالعاصمة الإدارية الجديدة، برئاسة البابا تواضروس، بابا الإسكندرية بطريرك الكرازة المرقسية.

وقال الرئيس عبد الفتاح السيسى، خلال زيارته مقر كاتدرائية ميلاد المسيح بالعاصمة الإدارية الجديدة: "كل عام وأنتم طيبين، وقداسة البابا بخير وسلام، واحنا كلنا إن شاء الله بخير وسلام، احنا كمان بنحبكم وانتو اخواتنا وحبايبنا.. ونأخذ بكل الأسباب لحماية بلادنا".

وتابع: "إن شاء الله عام سعيد، وسنة إن شاء الله تبقى بفضل الله سبحانه وتعالى أفضل من السنوات الماضية، بتابع كل الأمور وبشوف كل ردود الأفعال، والقلق يمكن يكون مبرر، لازم تعرفوا، ومش بكلمكم انتو بس، بكلم الدنيا في مصر وبرا مصر من خلالكم، إن شاء الله السنة دي تبقى أفضل من السنوات اللي فاتت".

وأضاف: "بقول القلق مبرر ومشروع يمكن، طب ما السنين اللي فاتت كان فيها قلق، وإن شاء الله تعدي الأمور بسلام، احنا هنا في مصر في حاجات كتير أو ي بنعملها محدش من الناس تاخد بالها كتير منها، أول حاجة فيها، إن احنا مش ناسيين إن في رب، وإن الرب ربنا سبحانه وتعالى".

واستكمل: "يمكن حد ينسى مع الظروف يتهيأله إن الأمور مش ممسوكة كده، مش بينا احنا، البشر، لا الدنيا مش متسابة كده، احنا مؤمنين بالله كلنا صحيح لكن مش عاوزين ننسى، لازم كلنا نبقى متأكدين من النقط دي، لازم كلنا نعرف إن ربنا موجود ومحدش يقدر يعمل أي حاجة في الوجود اللي احنا فيه ده إلا بأمر الله سبحانه وتعالى".

وختم حديثه قائلا: "احنا كدولة، كنت دايما بتتعامل مع الأمور بشرف كبير، وبأمانة كبيرة، وبنزاهة كبيرة، النقطة دي بقولهالكم، لو كان المسؤول عنكم إنسان مش كويس خافوا على بلدكم، لو ايده متعاصة بدم الناس خافوا على بلدكم، لو ايده واخدة أموال الناس خافوا على بلدكم، الحمد لله رب العالمين لا دي موجودة ولا دي موجودة".