الورقي
بالفيديو.. ضحية واقعة «قميص النوم» بحلوان للفنان محمد رمضان: «ارحم امنا»
كشف ضحية واقعة قميص النوم بحلوان عن التفاصيل الكاملة للحادث الذي وقع أواخر شهر رمضان، والذي قامت سيده بتجريده من ملابسه أمام المارة وإرغامه على ارتداء "قميص نوم أحمر" بالتعاون مع سلفها "كاباكا".
«النبأ» التقت بالشاب حسام حسن المجني الذي أكد أن السيدة التي أعتدت عليه قامت بسب أخته، وهو ما دفعه للذهاب اليها وروي ما دار بينهما قائلا " اللي حصل معاى أن تلك السيدة أتكلمت في شرف أختي وعرضها، وأنا رحت بقولها أزاي تجيبي سيرة أختي في حاجة زى كده، فقامت غلطت فيا فحصل بيننا مشادة كلاميه وشتمتني، وقبل ما امشي قولتلها لو بقك أتفتح وجبت سيرة أختي أنا هقطعك لسانك وتاني يوم الجمعة اتصلوا بيا قالولي الحق يا حسام .. هويدا جايبه احمد "كاباكا" اخو جوزها وجايب ناس بالسلاح بعدد شعر راسك وأبوك وأمك وأخوتك لوحدهم في البيت بيقولوا أن انت لو ما جتش هيقلعوا أمك وأخوتك في الشارع ويصورهم وهيسمعوك صوت امك وأختك في الشارع.
وأضاف "طبعا روحت علي طول وأول ما وصلت مسكني من شعري وعملوا حواليا دايره قدام أمي وأخوتي وإصحابي وجابوا موتسيكل ينوروا بيه ومعاهم سلاح وخرطوش، وواحد منهم ضربني بكعب بندقية علي دماغي وقالي "أنت غلطت في أم محمد وتطاولت عليها".. فقولتلها أه وما كنتش متوقع أية اللي هيحصل كنت متقع انها ها تضربني قلمين او هتضربني بالشبشب".
وتابع "لقيتها قالتلي اقلع يا ابن فلانه، وقلعت لانهم قالولي اعمل اللي بنقولك عليه وفضلت بالبوكسر وبعدين طلعت قميص النوم من صدرها وقالتلي البس قميص النوم ولبسته وبعدها راحت جايبه الشبشب، وقعدت تضرب فيا حتي فيه آثار جروح في وشي وضهري وبعدها قالتلي اركع على الأرض وركعت وبقت تديني علي دماغي وشتيمة والفاظ بذيية.. وكاباكا قال لابويا اطلع فوق واتفرج علي ابنك من فوق وقالولي هانديك طلقة في رجلك هتعجزك لو قاومت وبعد كده سبت المنطقة ومشيت وبعد كده لقيت الفيديو انتشر وبعدها بخمس ايام لقيت الناس بيتصلوا بيا وفي ضابط الله يباركلوا اتصل عليا وقالي تعالي انت ليك حق وهانجيبهولك والحمد لله من أصغر عسكري في القسم لأكبر رتبه كلهم عاملوني كآني أخ ليهم وده دين في رقبتي مش هانسهولهم طول العمر ولو طالت اقطع من لحمي علشان افديهم مش هتاخر.
ووجه رسالة للنجم محمد رمضان بطل مسلسل "الأسطورة" حيث قال "عايز اقول للنجم محمد رمضان أبوس علي رجلك انا عندي استعداد اطلع ع الهواء قدام الملايين " ارحمنا شوية من المشاهد اللي انت بتعلمها علشان أنا واحد من الناس اللي اتقهرت واتهتك عرضي واتظلمت بمشهد انت عملته".
وتابع "أبوس علي رجلك كفاية اللي أنت بتعلمه فينا ده.. أنت مفيش مشهد عملته إلا واتنفذ علي ارض الواقع والسلاح اللي حضرتك بتطلع تمثل بيه في التلفزيون أحنا نشوف الشباب كله ماسكاه علي ارض الواقع وكاباكا عمل معاي اللي انت عملته في المسلسل الأسطورة اللي انا ما اتفرجتش عليه واتنفذ عليا وأنا راجل صاحب حق.
وأكد الشاب علي أنه لن يفرط في حقه قائلا " أنا اتقهرت وعايز حقي و حضرتك تعرف تجيب لي حقي وترد لي كرامتي واعتباري مستعد أقابل حضرتك وهاتلي حقي قدام أخواتي البنات وأمي ورد إلي كرامتي وأتعامل فيا كده واتصورت فيديو وأنا لابس قميص مفيش اكتر من كده ذل وإهانة.
وخلال حديثة دخل الشاب في نوبة بكاء بعد أن تلقي تهديدات بعد خروجه من النيابة " بعد ما خرجت من النيابة قالي أوعي تفتكر ان الموضوع خلص "بس أتقل ع الرز يستوي" انا من ساعتها ما خرجتش من البيت وخايف حد يطعني او يضربني لان دي ناس سوابق وأنا مش قدها ودي واحده جوزها محبوس في آلي ومخدرات "وأحمد كاباكا" ده مسجل وكل الناس عارفة انهم مسجلين مشكور في كام واحد من المنطقة وقفوا معاي زي الاسطي رجب حشيشه وايمن التاكسي مش ناسيهم وجميلهم فوق دماغي وعم فتحي اللي قالها في الفيديو حرامي عليكي ما تفتريش شالني ولبسني هدومي.
