أسامة عادل يكتب: كله تمام

لملم كوم أحزانه فى شنطه

راح ورماها في أقرب نهر

سفلت وشه بأى أونطه

ركب الموجه لأقرب بحر

دفن الهم فى قلب الرمله

ضحك الضحكة بكل جنان

قام ومروح قابل حمله

بتفش على كل أمان


ركب التاكسي وراجع عكسي

قابله الجاني على الأحلام

داسه برجله وفرفش حلمه

شقلب كل ما فى الأفلام




صور نفسه لوحده بيضحك

علق صورته على التابلوه

ساق على آخره وآخر صبره

وصل الحلم وقاله سابوه




لملم كوم أفراحه فى شنطه

عانها فى خازنة قفلها تمام

واما بيحزن لحظه فى عمره

يفتح ياخد فرحه قوام

يضحك يحرق دم همومه

يخلص يومه وكله تمام