بعد شائعات انفصالها من معز مسعود.. حلا شيحة: أنا مش شيخة

كشفت الفنانة حلا شيحة، عبر حسابها الرسمي على موقع "إنستجرام"، حقيقة ما تداولته بعض الصفحات على مواقع التواصل الاجتماعي حول انفصالها عن زوجها الداعية معز مسعود. 

ونشرت حلا شيحة صورة جديدة لها وكتبت عليها: "لكل المتابعين والمحبين علي صفحتي وفي الوطن العربي حابة اقولكم مفيش اي خبر اتكتب عن معز وعني يخص الطلاق صحيح وكلامي في البوست اللي فات كان كلام عام ولم اقصد بيه حد معين ابدًا".

وأضافت: "ومعز بعيد عن الكلام ده تمامًا بالعكس هو سبب كبير.. لحاجات جميلة في حياتي وحياة اولادي ومشفتش كتير زي اخلاقه واحترامه وعيب الكلام اللي بيتقال عن صفحات السوشيل ميديا كله مش صح ابدا.. والله في مشاكل اكبر بكتير وحاجات أهم بكتير ممكن نتكلم فيها.. وأنا علي صفحتي بحب اشارك جمهوري ساعات بمعاني بحسها وبحسهم زيي وبحب اتواصل معاهم وابقي موجودة معاهم مش اكتر من كدة".

وتابعت حلا شيحة: "بالنسبة لحجابي انا قلت بحاول زيي زي بنات كتييير واكيد مش احسن حاجة بس انا كدة دلوقتي والحمد لله.. وانا مش شيخة انا انسانة عادية جدًا ليا حسناتي وليا سيئاتي والبشر كلهم كدة فبلاش حد يزايد علي حد وبدل ما نتريق أو نقول كلام مش مهم نكون متصالحين مع نفسنا ونبطل نحكم علي بعض احنا بشر مش ملايكة.. يلا انا مسامحة الكل معلش بشر بردو.. تصبحوا علي خير".

حلا شيحة تثير الجدل حول انفصالها

يذكر أن الفنانة حلا شيحة، أثارت جدلًا واسعًا، مؤخرًا، بعدما نشرت صورة تجمعها بأولادها وأصدقائها، عبر حسابها على موقع "إنستجرام" وكتبت عليها: "لحظات في حياتنا بتعدي مع ناس بنقابلهم مرة في العمر ولحظات مع أولادنا بنحس بيها بفرحة وحب وأمل ولحظات مع نفسنا بنتأمل فيها حياتنا كل ايامنا لحظات".

وأضافت حلا شيحة: "علشان كدة مفيش حاجة تستاهل الزعل والتفكير الزيادة وأجمل حاجة أن الواحد لما يتعب أو يحس إنه تايه أو متلخبط لازم يبقي متأكد ان مشاعره بتقوله حاجات محتاج يعرفها أو يفهمها أو يفهم نفسه اكتر ونتعلم ومش عيب نقول غلطنا ومش عيب نصلح اخطاءنا بس اهم حاجة منكملش ونعاند نفسنا ونعاقب نفسنا ونحكم علي نفسنا بالفشل، الفشل اننا نسيب نفسنا جوا نفس المشاكل ونستسلم".