"كل ده قفا".. دعاء تطالب بالتفريق أمام محكمة الأسرة والزوج يرد

"إداني علقة موت قدام أهلي عشان كنت بهزر معاه".. بهذه الكلمات وقفت "دعاء.ص" تطالب بالتفريق بينها وبين زوجها، بعد اعتدائه عليها بالضرب بسبب اعتراضها على مؤخرة عنق زوجها، الأمر الذي لم يتحمله الزوج؛ لتتوجه الزوجة إلى المحكمة الأسرة.

وقالت الزوجة في دعواها أمام محكمة الأسرة، إن زوجها اعتدى عليها بالضرب بسبب مزحة كان تعتاد الزوجة عليها مع زوجها: "مد إيده علي، وده كله علشان بهزر معاه وبقوله ده كل قفا، وأهلي بيهزروا معاه فضربني واداني علقة موت، وأنا مش عايزة أكمل معاه، وأهلي بيتريقوا عليه ومحرجة منه بسبب قفاه".

من جانبه رد الزوج على دعوى زوجته أمام محكمة الأسرة: "أنا بشتغل رسام ودي خلقة ربنا لا اعتراض عليها، وأنا راضي بشكلي، ولما تقدمت لها من 5 سنين مكانش لها أي تعلق على شكلي، بس بعد ما اتجوزنا بدأت هي وأهلها يتريقوا ويتنمروا علي، بس أنا كنت مستحملها هي وأهلها، وأنا كنت مستحمل علشان بحبها، وعلشان خاطر العيال".

وأضاف الزوج في رده على دعوى زوجته أمام محكمة الأسرة: "كل ما أروح عند أهلها يفضلوا يتنمروا علي وأنا استحملت كتير، وباخد الموضوع بهزار وصدر رحب، بس الموضوع زاد عن حده عشان بقوا كل شوية يتريقوا علي وعلى قفايا، بس هي بقى مش تقف جنبي وتساعدني وتمنعهم عن اللي بيعملوه، لأ دي كانت كمان بتتريق معاهم علي، وأنا راجل ومستحملش الكلام ده".

وأكمل الزوج في رده على دعوى زوجته أمام محكمة الأسرة: "5 سنين وأنا عايش في عذاب، ومستحمل تنمر وإهانة لحد ما كيلي طفح، ومبقتش أستحمل ووصلت بيها الدرجة إنها تمد إيدها علي وتضربني على قفايا، وتقولي كل ده قفا، فإيه المطلوب مني ومراتي بتضربني على قفايا، وبتتريق عليا هي وأهلها، وأنا تحملت علشان الأطفال، وفي الآخر جاية رافعة دعوى تفريق علشان ضربتها".