«مش قادرة أكمل».. تفاصيل دعوى طلاق داخل محكمة الأسرة

«استأمنته على نفسي بس المخدرات لحست نفوخه، 4 ولاد مش عارفة أعيش بيهم وبعد 10 سنين جواز مش قادرة أكمل تاني»، كلمات قاسية وقفت الزوجة "سهير. م" تطلب طلاق الضرر من زوجها أمام محكمة الأسرة، بعد أن عاشت حياة صعبة برفقته وأهله.

البداية كانت بزواج سهير منذ مايقرب من 10 سنوات تم بعد قصة حب كبيرة، نتج عنه 4 أطفال،  « كان جواز بعد قصة حب اتعرفت عليه عن طريق شغل، كان محترم جدا وكويس وابن ناس ومقتدر ماديا ومحصلش منه أي غلطة»، متابعة أمام محكمة الأسرة، بأن زوجها بعد إنجاب أطفالهما أصبح مدمنا، وقد علمت بذلك بعد ظهرت عليه آثار الإدمان، لتقرر بعدها الذهاب لأسرته كي ينجدهوها ولكنها صدمت بعدما أخبروها بعلمهم بالأمر، لتجد نفسها وحيدة دون سند.

وأضافت الزوجة في دعواها أمام محكمة الأسرة، بأنها قررت الوقوف بجانب زوجها لتعالجه فهي لا تريد انهيار أسرتها على أي حال، «دخلته مصحة لعلاج الإدمان وبعد ما قعد فيها أسبوع واحد أبو جوزي قالي احنا مش هنكمل في مصحات وفلوسها كتيرة علينا خلاه يطلع منها بحجه إنه يشوف حاله وشغله أحسن، عشان أخواته محتاجينه في الشغل معاهم».

وتابعت الزوجة في دعواها أمام محكمة الأسرة بأن زوجها بعدما خرج من مصحة علاج الإدمان، استغله إخوته وإنهالوا عليه ليسرقوا معرضه وأمواله، وأصبح لا يملك المال، «خدوا فلوسه وعربياته وبقى معهوش حاجة دلوقتي رموه وبقوا يعملوا معاه مشاكل عشان بقى أقل واحد في فلوسه بينهم، عملوا معايا مشاكل كتير جدا وسيبت بيتي قعدت سنتين عند أهلي هو مش قادر يبطل ومش عايزين يسبوه في حاله، لحد ما لقيت مفيش فايدة وكان لازم ارفع قضية نفقة عشان خاطر ولادي، هو صعبان عليا بس مفيش حل تاني قدامي»؛ لذا قررت الزوجة اللجوء لمحكمة الأسرة لطلب طلاق الضرر.