بعد هجومه عليهم.. علي الطيب يعتذر لصناع مسلسل "عمر أفندي"

وجه الفنان علي الطيب رسالة لصناع مسلسل "عمر أفندي"، بعد تعبيره في وقت سابق عن غضبه الشديد من عدم الإشارة إلى أسبقيته في استخدام جملة "دي حاجة 13 خالص" في مسلسل "أهو ده اللي صار"، وهي الجملة التي حققت انتشاراً كبيراً بعدما قالها "دياسطي" الشخصية التي قدمها مصطفى أبو سريع في مسلسل "عمر أفندي".

وكتب علي الطيب عبر حسابه الرسمي على موقع التواصل الاجتماعي "فيسبوك": "تم حذف البوست والأسباب هي.. أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في اي برنامج أو اي لقاء انهم اقتبسوها من وديع البساطي في مسلسل أهو ده اللي صار مصطلح موجود في مصر زمان فعلا مش انا اللي اخترعتها".

علي الطيب يهاجم صناع مسلسل عمر أفندي بسبب "حاجة 13 خالص"

وأضاف: بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله اختارنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم".

وتابع علي الطيب: "واتعرض المسلسل وربنا كتب لنا القبول في قلوبكم ونجح المسلسل واتشهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة ليها أصل ومعنى ووضحناه في المسلسل".

واستكمل في منشوره قائلًا: " وأظن احنا في مهنة واحده يعني عارفين شغل بعض ونعرف بعض كويس وبينا كل خير لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه واكرره أو اتجاهل مجهوده هو وصناع العمل واحترم نجاحه وحق كل فنان يغير ويبقى نفسه يعمل شخصية حلوة ويستمتع بأدائها المشاهد وده حق شرعي بس أظن ان التميز هنا هيكون في الاختلاف والاجتهاد المطلوب منك وليس الاستسهال".

وتابع: "ولنفرض حصل وقولت مصطلح يخص شخصية فنية لعبها زميل ومتفرجتش عليه أو مافيش حد نبهني.. يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء في اي برنامج أنه تم الاقتباس من العمل الفني اللي قبلنا.. ووقتها مش هيكون ليه حق ازعل وأفهمها تجاهل من زمايلي لأني غصب عني مفهمتهاش غير كده".

وأوضح: "واللي يعرفني كويس عارف إني دايما مبتأخرش عن زمايلي وبفرح لنجاحهم من قلبي ولا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا.. وأهم من كل ده اكتشفت أن بعض الصحفيين هيحولوا الموضوع لمشكلة وهيكبروا الموضوع بيني وبين حاتم وأبو سريع وآيه.. واحنا اللي بينا كل خير وصحاب واخواتي وعلى راسي وربنا يعلم أنهم غاليين عندي بس حسيت اني مش شرط يكون زعلى من تجاهلهم يفرق معاهم..فا محبتش اسيب الموضوع يكبر وتاخد اتجاه مش لطيف".

واختتم علي الطيب منشوره قائلًا: "طلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما اكتب بوست أوضح فيه وربنا ما يجيب زعل ولا مشاكل.. وعلى رأي البساطي الفنان أناني ومش عيب".