داخل محكمة الأسرة.. ياسمين في دعوتي طلاق للضرر ونفقة: "مش متعود يصرف"

"طردني من البيت عشان مش عاوز يصرف على عياله، متعود أشتغل وأصرف عليه، ولما الناس اتكلمت عليه رماني في الشارع"، هكذا بررت الزوجة " ياسمين. د" دعوتى طلاق الضرر ومتجمد النفقة التي أقامتها ضد زوجها، أمام محكمة الأسرة، مؤكدة عدم تحمل شريك حياتها المسئولية، واعتماده عليها في الإنفاق على المنزل، حيث أجبرها على العمل وحملها مسئولية الإنفاق.

وتابعت الزوجة في دعوتي طلاق الضرر ومتجمد النفقة، التي أقامتهما ضد زوجها، أمام محكمة الأسرة، أنها تزوجت منذ عام 2012، وأنجبت 3 أطفال من زوجها على فراش الزوجية، انفصلت عن زوجها منذ 9 أشهر، وأقامت ضده دعاوى نفقة ودعوى طلاق للضرر، وإلى الآن لم ينفذ أي حكم لصالحها، "معايا حكم بحبسه 6 شهور وغرامة 500 جنيه ومش عارفة آخد منه أي فلوس، حتى النفقة بالرغم أن معايا حكم لكن مش قادرة آخد منه حقي، لإنه كل شوية يستأنف ومستكتر فلوس النفقة على الولاد، بالرغم من إنه اشتغل وبقى معاه فلوس".

وأكملت الزوجة في دعوتي طلاق الضرر ومتجمد النفقة، التي أقامتهما ضد زوجها، أمام محكمة الأسرة، أن زوجها لا يحب العمل، شخص متكاسل، ويرفض أن يتحمل أي مسئولية، "مشكلتي معاه إنه مش بتاع شغل ولا شيل مسؤلية، من زمان وهو مش بيشتغل أنا اللي كنت بشتغل وأصرف على البيت وعلى العيال، وحتى لو اشتغل مكنش بيصرف على البيت، وكنت راضية وساكتة وقلت أساعده واقف جنبه عشان بيتنا وولادنا".

وأضافت الزوجة في دعوتي طلاق الضرر ومتجمد النفقة، التي أقامتهما ضد زوجها، أمام محكمة الأسرة، أن الجيران أصبحوا ينظروا إليه بنظرة دونية، فهو يعمل زلكن لا ينفق على المنزل، فقرر أن يرغمها على ترك العمل، ولكن دون الإنفاق عليها وأطفالهما، "طلب مني أقعد من الشغل عشان الناس بتقول إني بشتغل وممشية البيت، وقدام الناس شكله وحش وده اللي زعله، وافقت وقعدت في البيت وسيبت الشغل، لكن مفيش فلوس أصرف منها ع البيت، وهو مش عاوز يصرف، الدنيا قامت مقعدتش وأصبح مش طايقني".

واختتمت الزوجة حديثها في دعوتي طلاق الضرر ومتجمد النفقة، التي أقامتهما ضد زوجها، أمام محكمة الأسرة، أن زوجها لم يتحمل طلبات المنزل لمدة أسبوع، بالرغم من أنها طلبا قليلة جدا، " أسبوع واحد بس كان بيصرف فيه على البيت، ولكنه مستحملش فيه مصاريف البيت مع إني كنت بطلب منه طلبات عادية، وأقل طلبات كمان، لكن هو مش متعود على إن حد يطلب منه ويقوله هات، متعود إني بشتغل وبصرف من معايا وبدي العيال مصاريفهم كمان، عمل مشاكل كتير معايا وآخر مره اتخانقنا وشتمني بألفاظ مش كويسة وضربني وطردني من البيت".

وأمام تعنت الزوج قررت الزوجة اللجوء إلى محكمة الأسرة، لإقامة دعوتي طلاق للضرر، ونفقة ضد زوجها.