حسام حبيب غاضب من شائعات ارتباطه بـ سارة الأردنية: ابعدوا عن حياتي بقى!

من بعد ما انتشرت صور للفنان حسام حبيب وهو في حفلة صيفية مع العارضة الأردنية سارة، واشتعلت مواقع التواصل بتكهنات عن ارتباط رسمي، خاصة بعد ما سارة نشرت "ستوري" على أنغام أغنية "شوفت بعنيا"، وحسام نفسه عمل لها "ريبوست".

لكن من الواضح أن هذه الضجة قد أثارت غضب حسام حبيب، وقرر يخرج عن صمته ويوضح حقيقة ما تردد خلال تصريحاته ET بالعربي، وقال: "الموضوع ما وصلش خالص للخطوبة نهائي، هما سبقوا الأحداث وخلّوا الموضوع يتعقّد بدل ما يحصل فيه خير، يعني اللي حصل ده، مش عارف أقولهم إيه بصراحة، وأصلًا الحاجة اللي بيتكلموا عنها عمرها ما وصلت لربع اللي بيتقال. ومش عارف الناس عايزين إيه مني بجد، على طول الناس بتخربلي حياتي!".

وتابع بانفعال، مؤكدًا أن ما حدث ممكن أن يكون سبب فشل أي خطوة كانت ممكن تحصل قائلًا: "وإن كان في حاجة، هما كده بوّظوها، لأن أهل البنت ليهم عاداتهم وتقاليدهم، وناس محترمين جدًا جدًا. زيّ ما إحنا زمان كان لينا عاداتنا وتقاليدنا، وكنا بنتحرم يعني إيه بنت، يعني إيه نِفسِن عليها… مش عارف إيه اللي حصل للمصريين؟ النخوة اللي كانت عندنا راحت فين؟".

واستكمل حسام حديثه موجهًا رسالة مباشرة للجمهور والإعلام: "ابعدوا عن حياتي بقى، أنا مش عارف إيه ده! إمتى هتسيبوا الناس في حالها؟ عمرنا ما اتكلمنا عن مين خَطَب ومين اتجوز، ولو حصل، بيتكلموا بعد الأحداث. دلوقتي بيتكلموا عن بنت وليها عائلة كبيرة، وبقى كل همنا التريند والفيديو ده يجيب كام؟".

وأكد مرة ثانية إنه ما صرّحش بأي حاجة، وقال: "أنا مش عايز حد يتكلم عني، ولا الناس كلها تتكلم عني. طلعت مع بسمة وهبة وقلت إن الجمهور بقى آخر همي، عشان أوصل رسالة إني مش عايز تريند. هو في فنان بيقول كده؟ هما وصلوني لكده!".

أما عن التصريحات التي نُسبت له بخصوص الخطوبة، فأنكرها تمامًا وقال: "وكل شوية يطلعوا يقولوا إن حسام حبيب صرّح، أنا صرّحت فين؟ أنا ما قلتش حاجة لحد نهائي! وبعدين بيقولوا إن علاقتي بالبنت دي من سنين! هي أصلًا البنت عندها كام سنة عشان يتقال كده؟".

واختتم حديثه برسالة شديدة اللهجة، وشدد على أنه سوف يتخذ إجراءات قانونية: "واللي جاي بقى هيبقى وحش، وهيبقى في قضايا، ولازم كل حاجة يكون ليها حدود، ومش المفروض نتكلم عن أعراض الناس. وأنا هشوف مين اللي كتب الكلام ده على لساني وهحبسه، لأني ما قلتش لأي حد، وأنا هكبر المشكلة، لأن البنت دي بنت ناس كبيرة أوي في الأردن، فهندخل القضايا ونشوف بقى!".