«أديب»: فى حاجة غلط فى البلد..ولو كلمت السيسي هيقولك أعملك إيه

قال الإعلامي عمرو أديب، السبت، إن الأوضاع العامة في مصر ليست على ما يرام، وسيئة للغاية، مضيفًا: «في حاجة غلط، والناس مش مبسوطة، الأداء العام فيه حاجة غلط، وبطلوا إن لو في حاجة كويسة نقول الريس، أم لو شيء سيء نقول مش الرئيس، لا يا جماعة الرئيس من ضمن المسئولين».

وأضاف: «كل يوم المخطط الرئيسي بيتغير، يوم يقولك إحنا متجهين للعاصمة الجديدة، ويوم يقولك إحنا شغالين على قناة السويس، ويوم يقولك لا الطاقة النووية هدفنا.. فين يا جماعة خارطة الطريق؟ الأداء فيه حاجة غلط يا جماعة، والبلد بقى فيها محاور، وبقت كلها جبهات، والأسامي معروفة، يا جماعة في حلقة ضايعة، القرار الإداري اللي بيطلع مبيتنفذش، اشمعنى إحنا؟».

وتابع: «اليومين دول كل أما حد يسألني إحنا هنوصل ولا إيه، أقوله هنوصل بس مش عارف امتى، لأن في حاجة غلط، في شيء لازم يتصلح، السيسي نفسه لو كلمته هيشتكيلك، يا ريس في مشكلة، يقولك طيب وأنا أعمل ايه، بقينا في بلد الشكوى، كل الناس بتشتكي، أنا عايز أشوف حد مبسوط وراضي، حجم الإنجاز غير مرضي، وغير جيد، وإحنا في عنق الزجاجة، مستوى الرضى ابتدى يقل».