«عمرو أديب» يهاجم حكومة شريف إسماعيل ومجلس «النواب»

استنكر الإعلامي عمرو أديب، بيان الحكومة، الذي ألقاه رئيس الوزراء، المهندس شريف إسماعيل، أمام البرلمان، فضلاً عن تصرفات النواب قبل وبعد البيان، قائلًا: "لم يهتم أحد بالبيان، الناس اهتمت أكتر بانسحاب تشاد من تصفيات أمم إفريقيا".

وأضاف "أديب": "النواب أساءوا للمجلس، والمشهد غير لائق على الإطلاق، تصفيق غير عادي، تهافت النواب على الوزراء من تاني عشان يمضوا على الورق، شكل مهين، رجعنا 20 سنة لورا"، متسائلًا: هو ده مجلس النواب اللي الحكومة هتخاف منه؟، فين هيبة المجلس؟، هتحاسبوها إزاي بعد كده؟، كده خلاص الحكومة طوت المجلس تحت باطها، وطبعًا عشان كده ماكنوش عايزين يذيعوا الجلسة على الهوا".

وتابع: "ثورتين في البلد ونرجع تاني نقف طوابير أمام الوزراء عشان يمضوا؟، طيب ما تروح للوزير المكتب، ده بينكم وبين الوزراء شارع، إنما قدام الناس كده، إذا بُليتم فاستتروا، هل يصح هذا التصفيق الحاد لرئيس الوزراء؟، يا جماعة النواب وطوا قدام الوزراء، هل هو ده مجلس النواب اللي إحنا عايزينه؟، حاجة تنقط، كل ما نقول يا بلد لقدام نلاقي حاجات غريبة، هما دول اللي إحنا اختارنهم، كنا نجيب ختامة كبيرة بقى وبلاها مجلس نواب، معقولة دا منظر، هي البلد دي مش هتتغير بقى؟".

واستطرد: "هل دا منظر وشكل مجلس النواب اللي بيراقب على الحكومة؟، وطبعا الوزراء بيمضوا بسرعة وهما مبسوطين"، مطالبًا المجلس بفتح التحقيق في واقعة النواب ".