الورقي
كنت عايز أركب معاها الإسعاف والشرطة قالت مينفعش
نص التحقيقات مع المتهم بدهس طالبة بصلاح سالم فى مصر الجديدة
حصلت «النبأ »، على نص تحقيقات النيابة العامة مع المتهم بدهس إسراء أحمد، الطالبة بقسم الفلسفة بكلية تربية البنات في مصر الجديدة بالقاهرة، والذى يحمل جنسية إحدى الدول العربية، ويدرس الطب بإحدى الجامعات الحكومية.
وتسبب الحادث فى وفاة الطالبة بعد نقلها للمستشفى ودخولها غرفة العناية المركزة لنحو 10 أيام، وإلى نص التحقيقات:
س: ما قولك فيما هو منسوب إليك من أنك متهم بالتسبب خطأ في جرح المجني عليها إسراء أحمد بأن كان ذلك ناشئًا عن إهمالك ورعونتك وعدم احترازك وعدم اتباعك للوائح والقوانين اصطدمت بسيارتك بالمجني عليها فأحدثت بها الإصابات الموصوفة بالتقرير الطبي المرفق وقد نكلت عقب ارتكابك الواقعة عن مساعدة المجني عليها أو طلب المساعدة وقمت بالفرار بالسيارة تاركًا إياها بالطريق العام على النحو المبين بالتحقيقات؟.
ج: الكلام ده محصلش وأنا اللي طلبتلها الإسعاف من رقم زميلي اللي كان معايا.
س: ما الذي حدث إذًا وما هي ظروف الواقعة؟
ج: اللي حصل إن أنا كنت ماشي في شارع صلاح سالم، وأنا معرفش بالظبط فين في صلاح سالم، لأن أنا مش حافظ المكان، وأنا ماشي فوجئت بواحدة قدام العربية حاولت أفاديها لكن مقدرتش، واصطدمت بها وبعدها وقفت على يسار الطريق بس موقفتش علطول عشان في عربيات مسرعة جاية من ورايا فهديت لغاية لما وقفت على الشمال ونزلت وطلبت لها الإسعاف ومتحركتش لغاية لما الإسعاف جت وشالتها، وكنت عايز أركب معاها عربية الإسعاف بس الشرطة قالتلي مينفعش عشان لازم أروح على القسم معاهم وبعدها اتحجزت في قسم الشرطة وكان في واحد صديقي بيتواصل مع أهلية المصابة وراحلهم المستشفى ومعرفتش أروحلهم لأني كنت محجوز في القسم، ولما طلعت كان عندي امتحانات وده كل اللي حصل.
س: متي وأين حدث ذلك؟
ج: الكلام ده حصل يوم 26 فبراير 2022 حوالي الساعة 11:00 الصبح أو بعد كدة بشوية في شارع صلاح سالم مصر الجديدة.
س: وما سبب ومناسبة تواجدك بالمكان والزمان سالفي البيان؟
ج: أنا كنت متجه إلى الحسين وكنت جاي من المطار.
س: من كان برفقتك آنذاك؟
ج: أنا كان معايا أصدقائي فيصل تركي، وعبدالله محمد، ومالك، ودول مش مصريين.
س: صف لنا تحديدًا كيفية وقوع الحادث؟
ج: اللي حصل كنت ماشي على الطريق في منتصف الطريق وفجأة لقيتها أمامي وحاولت أتفاداها لكن صدمتها بالسيارة وفضلت ماشي بالعربية لحد ما هديت ووقفت على يسار الطريق ونزلت علشان أطمن عليها.
س: وهل سبق اتهامك في قضايا مماثلة؟
ج: لأ.
س: أنت متهم بالتسبب خطأ في جرح المجني عليها إسراء أحمد بأن كان ذلك ناشئًا عن إهمالك ورعونتك وعدم احترازك وعدم أتباعك للوائح والقوانين بأن اصطدمت بسيارتك، بالمجني عليها فأحدثت بها الإصابات الموصوفة بالتقرير الطبي المرفق وعقب ارتكابك الواقعة عن مساعدة المجني عليها أو طلب المساعدة قمت بالفرار بالسيارة تاركًا إياها بالطريق على النحو المبين بالتحقيقات؟
ج: محصلش
س: أنت متهم بقيادة السيارة دون حملك رخصة قيادة خاصة صادرة من الإدارة العامة لمرور جمهورية مصر العربية حال كونك حاصل على إقامة مصرية على النحو الوارد بالأوراق؟
ج: انا كنت فاكر إني أقدر أمشي برخصة دولتي، والغالب على علمي من زمايل كتير ليا من دولتي أنهم بيمشوا بالرخصة بتاعتهم، وأنا أول مرة أعرف الموضوع ده.
