"اتجوز بفلوسي".. ميادة تقيم دعوى قائمة منقولات زوجية داخل محكمة الأسرة

"22 سنة عايشة معاه، وفي النهاية غدر بيا، افتكرته هيكون سندي في الدنيا وهيحافظ عليا بعنيه، بس سرق فلوسي وخاني ورماني أنا وعيالي وهرب"، بتلك الكلمات بررت "ميادة. ط"، إقامة دعوى قائمة منقولات زوجية، لتحصل على حقها في قائمة المنقولات، بعدما غدر بها زوجها الذي عاشت معه 22 عاما وأنجبت منه أطفالها، وظنت أنه سيكون شريك حياتها لكنه خانها وسرقها وتركها هي وأولادها دون سؤال. 

وأضافت الزوجة في دعوى قائمة المنقولات التي أقامتها ضد زوجها، أمام محكمة الأسرة، أنها تزوجت منذ مايقرب من 22 عاما، حيث كان زوجها هو صاحب أخيها المقرب، أنجبت منه ولد في 3 جامعة وفتاة في الإعدادية، "جوزي زمان كان كويس جدا ومكنش فيه أي مشاكل معاه أو مع أهله، وكان بيشتغل ويصرف على البيت وأنا بشتغل وفلوسي معايا وبساعد لو البيت احتاج حاجة، والحياة كانت ماشية وكنا زي أي اتنين عاديين".

وتابعت الزوجة في دعوى قائمة المنقولات التي أقامتها ضد زوجها، أمام محكمة الأسرة، أن الخلافات بدأت منذ عام تقريبا، فقد امتنع زوجها في ذلك الوقت عن الإنفاق على المنزل، وعندما حاولت التفتيش وراء تصرفاته وجدته على علاقة بالكثير من النساء، على عكس طبعه وما تعودت عليه، " المشاكل معاه بدأت من سنة بس، بطل يصرف غير قليل جدا، وهو عمره ما كان كده زمان، وأكبر مشكلة كانت إنه بقى يخوني ويعرف عليا ستات، الأول شكيت فيه بس بعد كدة هو راح قال لأخويا صاحبه إنه هيتجوز عليا، صبرت عليه عشان خاطر ولادي".

وأكملت الزوجة في دعوى قائمة المنقولات التي أقامتها ضد زوجها، أمام محكمة الأسرة، " في يوم لقيته داخل عليا ومعاه خشبة كبيرة، ضربني وهددني إنه هيموتني، وسرق مني الدهب بتاعي عشان عايز يتجوز ويبقى معاه فلوس يجهز نفسه، وأخد مني الدهب فعلا ووداه عند أهله، بعد كل اللي عمله معايا رجعتله تاني لما وعدني أنه هيتعدل معايا ويرجعلي دهبي، لكن اللي فيه طبع ميقدرش يغيره".

وتابعت الزوجة في دعوى قائمة المنقولات التي أقامتها ضد زوجها، أمام محكمة الأسرة، أنها عادت لزوجها بعد الكثير من الوعود التي وعدها لها، ولكنه ظل على طبعه الصعب، فضلا عن أنه بدأ يكلم المرأة التي يواعدها، حتى سمعه أطفاله وبلغوا والدتهم، "بعد ما رجعتله متعدلش وفضل زي ماهو، وبقى أوحش بيكلم الست اللي يعرفها عليا ولاده سمعوه وقالولي ولما واجهته مد ايده عليا تاني، وقتها سيبته ومقدرتش أرجعله تاني".

واختتمت الزوجة في دعوى قائمة المنقولات التي أقامتها ضد زوجها، أمام محكمة الأسرة، أنها تركت منزلها منذ 5 شهور، ولكنها حصلت على الطلاق بحكم محكمة، "مسألش فيا أو في عياله من ساعتها، سيبت البيت وسافرت بنتي الصغيرة بس معايا وهي اللي طلبت إني أخدها معايا، رفعت عليه قضية طلاق وكسبتها وقضايا نفقة لبنتي وليا، دلوقتي رافعة قضية بالقايمة عشان حقي اللي سرقه مني".