"معاه هخسر حياتي وحياة بنتي".. شهيرة تقيم دعوى طلاق للضرر بمحكمة الأسرة

«مدمن وحياتي معاه عبارة عن ضرب وإهانة، سنين طويلة استحملته كتير، خوفت على بنتي حياتها تدمر بسبب طلاقنا، لكني اكتشفت إني معاه هخسر حياتي وحياة بنتي»، بتلك الكلمات لجأت الزوجة "شهيرة. ط" إلى محكمة الأسرة، لتكون ملجأها الأخير بعد الحياة الصعبة التي عاشتها مع زوجها المدمن، ولسنين تحملته الزوجة حتى لا تخرب بيتها وتدمر حياة ابنتها الوحيدة، ولكن عندما وصل الأمر إلى احتمالية خسارة حياتها قررت أن تنهي هذا العذاب وتحصل على نهاية لزواجها عن طريق محكمة الأسرة وتقيم ضده دعوى طلاق للضرر.

وقالت الزوجة في دعوى طلاق الضرر التي أقامتها ضد زوجها، أمام محكمة الأسرة، أنها تزوجت من 13 عاما، من قريب لها، أنجبت منه على فراش الزوجية طفلة واحدة، وأقامت ضده دعوى طلاق للضرر منذ 6 أشهر، «من ساعة ما رفعت القضية وأنا متبهدلة في المحاكم بسببه، كنت صابرة عليه كتير بقالي 13 سنة صابرة خلفت منه ولد بعد 7 سنين جواز واتوفى وخلفت بعدها بنتي».

وتابعت الزوجة في دعوى طلاق الضرر التي أقامتها ضد زوجها، أمام محكمة الأسرة، «الحياة في أول الجواز كانت هادية ومفيش مشاكل أول سنتين جواز بس، اكتشفت إن جوزي بيشرب مخدرات، وعرفت لما شوفته، وبعد المخدرات أصبح واحد تاني، بقى بيضربني ويشتمني ويبهدلني وهو عمره ما كان بيعمل كده زمان».

وأضافت الزوجة في دعوى طلاق الضرر التي أقامتها ضد زوجها، أمام محكمة الأسرة، أنه كان يضربها بمنتهى القسوة، وبعد الزواج بعامين بدأ في شرب مخدر الحشيش، حتى وصل مرحلة الإدمان، « بيضربني من زمان وأنا بسكت وأعدي عشان بيتي وبنتي، كان بيضربني بسبب ومن غير سبب، لو السماعة اتقطعت يقولي إنتي اللي قطعتيها ويمسكني يضربني، لحد آخر مشكلة كان عامل حادثة ورجله اتكسرت، وقتها قال على إخواتي إن هما اللي كسروا رجليه وأنا إخواتي معملوش حاجة، دماغه اللي بيتهيأله فيها كده، وقالي هجبلك عاهة مستديمة زي ما إخواتك عملوا معايا، ضربني بالكاتل وعملي عاهة مستديمة فعلا».

واختتمت الزوجة في دعوى طلاق الضرر التي أقامتها ضد زوجها، أمام محكمة الأسرة،  «سايباه من 10 شهور  من آخر مرة ضربني وشوهني، دخلت المستشفى ولما خرجت قررت مش هكمل معاه، وخدت العفش ورفعت نفقة وطلاق للضرر بالتقرير الطبي بعد ضربه، مبيسألش فيا ولا في بنته ولا بيتقي ربنا فينا بعد ما صبرت عليه طول السنين دي».